بقلم : يزيد العلوي الإسماعيلي
« كيف يصبر قلبي؟؟؟ »
في 3 تنهيدات ※※※
اتمنى ان تنال اعجابكم
جِيتكم غَ داوي بكلام طـــــايح السُّوم
من كْلام قْهــاوي حتى يبـــــــان مفهوم
شفت الحالة فْ لُون الَبُنّ
شفت حليبنا عـــــــاد لْبَن
و اللبن حين حماض و فاض صار مسموم
※※※※※※※※
التنهيدة (1)
كيف يصبر قلبي على من عليل مكلوم ؟
كيف يحلا حالي و الحال حالك حموم ؟
لا مَن قوي عـــــــــاد يحن
على ضعيف خديــم مَّحن
شــــاقي ف نهـــارو و الليل بات مضيوم
ريت ظالم ذو مال شكى و بات مظلوم
و لسان المظلوم طوى جواه ... ملجوم
ذاك ظــــــالم ديما يدهن
اما المظلوم عايش لَوهن
لْهَاتُو شِيعارات و الحق راه مردوم
ياما من فــــــــاسد حطوه ناس مشموم
أمـــــا سليل الاصل بين الركان محكوم
عقل العــاقل راح يجن
ضاع مكيالو باش وزن
لا اعراف تفيدو والا جدات لَـــعلوم
يا واضع ناموس قضا(ء) ف واد مبهوم
ما نجا من موجو من لا دراش ف العوم
ياما من قـــــانون تسن
كن غير بلا به احسن
الفايدة ف من يعدل لا في رقيم ملغوم
بـــاش فادت لَطعون يلا تحط مرسوم ؟
و بين قاضي و قضا لحكام بات محسوم
مهمـــــا تندد و تطعن
غير سب اشتم او لعن
را مصيرك باين و الوضع صــــــار محتوم
※※※※※※※※
راني غ داوي بكلام طـــــــــايح السوم
من كلام قهــاوي حتى يبـــــــان مفهوم
شفت الحالة فْ لُون البن
شفت حليبنا عـــــــاد لْبَن
و اللبن حين حماض و فاض صار مسموم
※※※※※※※※
التنهيدة (2)
راه فايض قلبي و اللسان بات ملجوم
يلا نزيح غطـــاتو بغتة تفيض لَهموم
راه فالقلب الهم سْكُن
و مــا زال يزيد يدَكَّن
على شفاتي بسمة تخفي خيال مهزوم
مداد ما سلم من سوسة فالسوق ما سوى سوم
كسدرة ف كسدة مدسوسة و الباس بان مرسوم
حارو فيه الْبُو و البَن
دون ما يدْرُو شْكُون و مَن؟
جميعنا مسؤولين و الذنب راه مقسوم
ساح صدى لصياح حتى بحاح حلقوم
مـــا فاد صياحي ولا جدا ف ذ القوم
حرب هاذ الدا علينا شن
مــات الادب جاف الفن
لا لوان ف ريشة والا مداد ف قلوم
ريت ظل الجاهل بدا يدور و يحوم
دار راسو عالم و الجهل بــان مفهوم
مــــا رميتو بسوء الظن
برهــاني العين و الوذن
ذا الا ظل دخيل و الحكم فيه محسوم
ذاك ســـادج ملهي، لاخر غاط ف النوم
و ذاك بايت حاضي ليلة يعد ف نجوم
ضايع وقتو ما يفطن
عايش ف هم و لَغبن
داوي ف الخــــاوي و الجد فيه معدوم
لا تقبل منّة مَن مِن اخلاق معدوم
كل لقمة منو تُلقى ف الحلق...زقوم
لم و لا و ثم لَن
ما ترضى تقبل بِالمَنّ
مــا تطاطي راسك و لو تطيح لَسْهوم
※※※※※※※※
و باقي غ داوي بكلام طـــــــــايح السوم
من كلام قهــاوي حتى يبـــــــان مفهوم
شفت الحالة فْ لُون البن
شفت حليبنا عـــــــاد لبن
و اللبن حين حماض و فاض صار مسموم
※※※※※※※※
التنهيدة (3)
جار جرجر جارو بهجا(ء) جور و هجوم
و قبيح اللهجة ... نهجو راه مهزوم
جاب عدو فينا يطعن
بــاع ذمة و للحرب علن
صار نـاقد حـاقد و من اخلاق معدوم
قــــــــالو ناس زمان: يلا الجار جاثوم
سِر صــــــادق البعيد و لو كان مجدوم
و خلي السن يضحك للسن
و اجْمَع قُـــــــوَّة و تمكن
را الدخيرة تنگي لَعدُو ف يوم مشؤوم
را الدا(ء) من الَعدَا يَعدِي كْما الجرثوم
و لازم نتصدى الَأْدى بصوت مكتوم
ما نقبلو الذل و الَوْهَن
قالو : مَن حن يتْمحن
يكفي شعــــــارات و من عتاب و اللوم
جـــــــــــــارنا عادانا و دعم ضدنا روم
عــــــــــادى و تمادى و لا ارتاح لو يوم
حط ف الجنوب من يزن
دعم فالشمـال مستوطن
و ياما من مْصاب كْثـــار جاب بِالْكُوم
و نْهِيت خْطابي بكلام طـــــايح السُّوم
من كْلام قْهــاوي حتى يبـــــــان مفهوم
شفت الحالة فلُون الَبُنّ
شفت حليبنا عـــاد لْبَن
و اللبن حين حماض و فاض صار مسموم
ب 🖊 #يزيد_العلوي_الإسماعيلي
تعليقات
إرسال تعليق