الخاوة /// بقلم : حسن صبي 🎶🎶🎶🎶🎶🎶
........................الخاوة...................
مال الخاوة ما بقات خاوة
الخاوة رجعت كلمة فالفم
الناس ولات كلاب تتعاوة
قلب سود ؤ زرواطة فالكم
شفت الخاوة بعيني تتهاوة
شفت الخير بين الناس التم
غاب الكرم غابت السخاوة
تعاداو الخوت مع ولاد العم
غبر الحب وزادت العداوة
رجع الخو يسقي خوه السم
ملي يجبدو الخوت الجناوة
ملي يسيل بين الخوت الدم
ملي يحكمو الخوت الهراوة
علاش الخاوة هاكذا تتقسم
إلى فقد الحب فيك الطراوة
لا تحسب راسك باقي مسلم
الخاوة تدوم غير بالصفاوة
ؤبلا خوك كلشي عليك يزعم
حيث الخاوة عندها حلاوة
يعرفها للي من الخوت تحرم
عايش المسكين فالشقاوة
ؤ غيرو بين الخوت ديما منعم
لا تخدم مع خوتك المضاوة
ولا تگول أنا لي خصني نحكم
حلو المشاكل غير بالهداوة
إلى بغاو الحرب روم نتا للسلم
يجي نهار ؤتزول الغشاوة
يجي نهار ؤيتكشف فيه الظلم
يجي نهار الخواطر تتساوة
فيه الظالم يحني الراس ؤيحشم
حسن صبي ..
تعليقات
إرسال تعليق