بقلم : يزيد علوي إسماعيلي ⛷🏂🏌️♂️🏌️♀️🥅
★★ مازال الحال ، على الديوان ★★
قالوا لي : دير الديوان راك تكتب مزيان
قلت لهم : ما زال الحال حتى نتعلم اكثر
باقي نتلف بين قياس و ما ضابط لوزان
و باش نعطي جودة ف كتاب لازمني نصبر
ما بغيت حروفي تتحط في رفوف النسيان
بغيت حرفي يبقى شاهد حين يفنى لَعمر
بغيت ديوان شبيه جنان فيه ريح الريحان
من شمّو يغفو ف نسايمو بلا ما يشعر
شنو قْدِيت يلا درت كتاب ما تنظرو لَعيان ؟
ما استافذ منو قاري وْلا ابني به افخر
الديوان اللي ما يغري غِ وْرَق حرفو فان
اول ما يتحط ف رف ما باقي يظهر
بغيت حرفي نهديه لناس تعانقو بالأحضان
يلا قراه العاشق يعانقو و يرعاه اكثر
ما نبيعو بالمال و مرادي نوهبو مجان
و كل واحد وصلو حرفي تراه فيا يشكر
يكون حامل جديد نظامو معاني و بيان
من قراه يتْرَحَّم و في دعاه ليّا يذكر
طالب من ربي لَعوين يفك عقدة ف لّسان
و يلا راد الله سبحانو ف لحظة يقدر
★ يزيد ★
تعليقات
إرسال تعليق